YeChL. «Barselona» сафарда «Атлетико»ни мағлуб этди, бироқ турнир билан хайрлашди
UEFA Чемпионлар Лигасининг чорак финалидан ўрин олган «Атлетико Мадрид» ва «Барселона» жамоалари ўртасидаги жавоб учрашуви якунланди. Мадриддаги «Сивитас Метрополитано» стадионида кечган баҳсда каталонияликлар 2:1 ҳисобида ғалаба қозонишди, бироқ дастлабки ўйинда «матрасчилар»нинг қўли баланд келгани (2:0) сабабли, умумий натижа бўйича Мадрид клуби кейинги босқичга йўл олди.
Учрашувни Клеман Тюрпен бошчилигидаги ҳакамлар бригадаси бошқариб борди. Ўйиннинг 4-дақиқасида Ламин Ямал ҳисобни очиб, меҳмонларни олдинга олиб чиқди. 24-дақиқада Ферран Торрес «кўк-анорранглилар»нинг устунлигини мустаҳкамлади. 31-дақиқада эса Адемола Лукман мезбонларнинг жавоб голини уришга муваффақ бўлди.
Иккинчи бўлимнинг 55-дақиқасида Ферран Торрес рақиб дарвозасига учинчи голни ҳам киритган эди, бироқ офсайд сабабли ушбу гол инобатга олинмади. Ўйин якунланиши арафасида, 80-дақиқада меҳмонлар ҳимоячиси Эрик Гарсия қизил карточка олиб, майдонни тарк этди.
Маълумот учун, 1/8 финал босқичида «Барселона» икки ўйин натижасига кўра «Ньюкасл»ни 8:3 ҳисобида доғда қолдирган эди. «Атлетико» эса худди шу босқичда «Тоттенхэм»дан устун келган (умумий ҳисоб — 7:5).
