Яя Ситҳоле ЖЧ-2026да илк қизил карточкани олган футболчига айланди
Жанубий Африка Республикаси (ЖАР) терма жамоаси яримҳимоячиси Яя Ситҳоле Мексикага қарши кечаётган ЖЧ-2026нинг очилиш учрашувида, ўйиннинг 49-дақиқасида қизил карточка олди. Натижада у жорий Жаҳон чемпионатида майдондан четлатилган илк футболчига айланди.
Мексика ва ЖАР терма жамоалари ўртасидаги ўйин «А» гуруҳидан ўрин олган. Ушбу гуруҳнинг 2-турида Мексика миллий жамоаси 19-июн куни Жанубий Корея билан тўқнаш келса, 3-турда (25-июн) Чехияга қарши майдонга тушади. ЖАР эса 2-турда Чехия билан (18-июн), 3-турда эса Жанубий Корея билан (25-июн) куч синашади.
Футбол бўйича 2026-йилги Жаҳон чемпионати 11-июндан 19-июлга қадар АҚШ, Канада ва Мексика майдонларида бўлиб ўтмоқда. Эслатиб ўтамиз, амалдаги дунё чемпиони Аргентина терма жамоаси ҳисобланади. 2022-йилги сайёра биринчилиги финалида Аргентина миллий жамоаси Франция билан тўқнаш келган эди. Ўшанда ўйиннинг асосий вақти 3:3 ҳисобида якунланган, аммо пенальтилар сериясида аргентиналиклар рақибдан устун келишган эди (4:2).
