Yaya Sitxole JCh-2026'da ilk qizil kartochkani olgan futbolchiga aylandi
Janubiy Afrika Respublikasi (JAR) terma jamoasi yarimhimoyachisi Yaya Sitxole Meksikaga qarshi kechayotgan JCh-2026ning ochilish uchrashuvida, oʻyinning 49-daqiqasida qizil kartochka oldi. Natijada u joriy Jahon chempionatida maydondan chetlatilgan ilk futbolchiga aylandi.
Meksika va JAR terma jamoalari oʻrtasidagi oʻyin «A» guruhidan oʻrin olgan. Ushbu guruhning 2-turida Meksika milliy jamoasi 19-iyun kuni Janubiy Koreya bilan toʻqnash kelsa, 3-turda (25-iyun) Chexiyaga qarshi maydonga tushadi. JAR esa 2-turda Chexiya bilan (18-iyun), 3-turda esa Janubiy Koreya bilan (25-iyun) kuch sinashadi.
Futbol boʻyicha 2026-yilgi Jahon chempionati 11-iyundan 19-iyulga qadar AQSH, Kanada va Meksika maydonlarida boʻlib oʻtmoqda. Eslatib oʻtamiz, amaldagi dunyo chempioni Argentina terma jamoasi hisoblanadi. 2022-yilgi sayyora birinchiligi finalida Argentina milliy jamoasi Fransiya bilan toʻqnash kelgan edi. Oʻshanda oʻyinning asosiy vaqti 3:3 hisobida yakunlangan, ammo penaltilar seriyasida argentinaliklar raqibdan ustun kelishgan edi (4:2).
