Янник Синнер совринлар сони бўйича Карлос Алкарасни ортда қолдирди
Италиялик теннисчи Янник Синнер яккалик баҳсларида фаолиятидаги 27-совринни қўлга киритди. Бугун, 12 апрель куни дунёнинг иккинчи рақамли ракетка устаси Монте-Карло «Мастерс» турнири финалида Карлос Алкарасни 7:6 (7:5), 6:3 ҳисобида мағлуб этди.
Шу тариқа, Синнер совринлар сони бўйича испаниялик рақибидан ўзиб кетди — ҳозирда Алкарас ҳисобига 26 та ғалаба мавжуд.
Бу Синнер учун грунт қопламали кортларда қўлга киритилган иккинчи чемпионлик бўлди (илк муваффақият 2022 йили Умагдаги турнирда қайд этилган). Монте-Карлодаги ғалаба Янникка Professional теннисчилар ассотсиацияси (ATP) рейтингда яна биринчи ўринга кўтарилиш имконини беради. У Карлос Алкарасни пешқадамликдан туширади.
Онлайн-рейтингда италиялик теннисчи 13 400 очко жамлаган бўлса, испаниялик спортчи ҳисобига 13 240 очко мавжуд.
