Yannik Sinner sovrinlar soni boʻyicha Karlos Alkarasni ortda qoldirdi
Italiyalik tennischi Yannik Sinner yakkalik bahslarida faoliyatidagi 27-sovrinni qo‘lga kiritdi. Bugun, 12 aprel kuni dunyoning ikkinchi raqamli raketa ustasi Monte-Karlo «Masters» turniri finalida Karlos Alkarasni 7:6 (7:5), 6:3 hisobida mag‘lub etdi.
Shu tariqa, Sinner sovrinlar soni bo‘yicha ispaniyalik raqibidan o‘zib ketdi — hozirda Alkaras hisobida 26 ta g‘alaba mavjud.
Bu Sinner uchun grunt qoplamali kortlarda qo‘lga kiritilgan ikkinchi chempionlik bo‘ldi (ilk muvaffaqiyat 2022 yili Umagdagi turnirda qayd etilgan). Monte-Karlodagi g‘alaba Yannikka Professional tennischilar assotsiatsiyasi (ATP) reytingida yana birinchi o‘ringa ko‘tarilish imkonini beradi. U Karlos Alkarasni peshqadamlikdan tushiradi.
Onlayn-reytingda italiyalik tennischi 13 400 ochko jamlagan bo‘lsa, ispaniyalik sportchi hisobida 13 240 ochko mavjud.
