Янник Синнер кетма-кет бешинчи бор «Masters» чемпионлигини қўлга киритган тарихдаги биринчи теннисчига айланди
Дунёнинг биринчи рақамли ракеткаси, тўрт карра «Катта дубулға» турнирлари ғолиби Янник Синнер тарихий натижани қайд этди. Италиялик теннисчи кетма-кет бешинчи бор «Masters» сериясига кирувчи турнирда ғолиб чиқиб, афсонавий Новак Жокович ва Рафаэль Надалга тегишли бўлган рекордни янгилади. Аввалроқ сербиялик ва испаниялик теннисчилар кетма-кет тўрттадан «Masters»да зафар қучишган эди.
Синнернинг ушбу ғалабали серияси 2025 йилги мавсум охирида Париждаги турнирда бошланган эди. Жорий йилда эса у «Қуёшли дубль» (Индиан-Уэллс ва Майами) ҳамда Монтекарло турнирларида тенгсиз эканини исботлади.
Бугун, 3 май куни италиялик спортчи Мадридда (Испания) бўлиб ўтган турнир финалида ҳам муваффақиятини давом эттирди. Ҳал қилувчи баҳсда у дунёнинг учинчи рақамли теннисчиси, германиялик Александр Зверевни бор-йўғи 58 дақиқа ичида 6:1, 6:2 ҳисобида мағлубиятга учратди. Синнернинг бу ғалабаси уни замонавий тенниснинг мутлақ етакчисига айлантирди.
