Yannik Sinner ketma-ket beshinchi bor «Masters» chempionligini qoʻlga kiritgan tarixdagi birinchi tennischiga aylandi
Dunyoning birinchi raqamli raketkasi, to‘rt karra «Katta dubulg‘a» turnirlari g‘olibi Yannik Sinner tarixiy natijani qayd etdi. Italiyalik tennischi ketma-ket beshinchi bor «Masters» seriyasiga kiruvchi turnirda g‘olib chiqib, afsonaviy Novak Jokovich va Rafael Nadalga tegishli bo‘lgan rekordni yangiladi. Avvalroq serbiyalik va ispaniyalik tennischilar ketma-ket to‘rttadan «Masters»da zafar quchishgan edi.
Sinnerning ushbu g‘alabali seriyasi 2025 yilgi mavsum oxirida Parijdagi turnirda boshlangan edi. Joriy yilda esa u «Quyoshli dubl» (Indian-Uells va Mayami) hamda Monte-Karlo turnirlarida tengsiz ekanini isbotladi.
Bugun, 3 may kuni italiyalik sportchi Madridda (Ispaniya) bo‘lib o‘tgan turnir finalida ham muvaffaqiyatini davom ettirdi. Hal qiluvchi bahsda u dunyoning uchinchi raqamli tennischisi, germaniyalik Aleksandr Zverevni bor-yo‘g‘i 58 daqiqa ichida 6:1, 6:2 hisobida mag‘lubiyatga uchratdi. Sinnerning bu g‘alabasi uni zamonaviy tennisning mutloq yetakchisiga aylantirdi.
