Янник Синнер ATP рейтингида кучли йигирматага кирган спортчилар устидан қозонган ғалабалар сонини 100 тага етказди
Италия вакили Янник Синнер Монте-Карло «Мастерс» турнири ғолибига айланди. У ҳал қилувчи баҳсда дунёнинг биринчи рақамли ракета устаси Карлос Алкарасни 7:6 (7:5), 6:3 ҳисобида мағлуб этди. Шу тариқа, италиялик теннисчи ATP рейтингида кучли йигирматага (Топ-20) кирган спортчилар устидан қозонган ғалабалари сонини 100 тага етказди.
Қайд этиш жоизки, Топ-20 теннисчиларига қарши ўтказилган баҳсларда Синнер 100 та ғалаба ва 47 та мағлубият қайд этган.
Шунингдек, ушбу муваффақият Синнер учун якка разряддаги фаолиятидаги 27-соврин бўлди. У совринлар сони бўйича Алкарасдан (26 та ғалаба) ўзиб кетишга муваффақ бўлди.
Монте-Карлодаги ғалаба Янникка яна Professional теннисчилар ассоциацияси (ATP) рейтингида пешқадамликни қайтариб беради. У Карлос Алкарасни биринчи поғонадан тушириб юборади. Онлайн-рейтингида италиялик теннисчи ҳисобида 13 400 очко мавжуд бўлса, испаниялик спортчи 13 240 очкога эга бўлиб турибди.
