Yannik Sinner ATP reytingining kuchli yigirmataligiga kiruvchi sportchilar ustidan qozonilgan gʻalabalar sonini 100 taga yetkazdi
Italiya vakili Yannik Sinner Monte-Karlo «Masters» turniri g‘olibiga aylandi. U hal qiluvchi bahsda dunyoning birinchi raqamli raketa ustasi Karlos Alkarasni 7:6 (7:5), 6:3 hisobida mag‘lub etdi. Shu tariqa, italiyalik tennischi ATP reytingining kuchli yigirmataligiga (Top-20) kiruvchi sportchilar ustidan qozonilgan g‘alabalari sonini 100 taga yetkazib oldi.
Qayd etish joizki, Top-20 tennischilariga qarshi o‘tkazilgan bahslarda Sinner 100 ta g‘alaba va 47 ta mag‘lubiyat qayd etgan.
Shuningdek, ushbu muvaffaqiyat Sinner uchun yakkalik bahslaridagi faoliyatidagi 27-sovrin bo‘ldi. U sovrinlar soni bo‘yicha Alkarasdan (26 ta g‘alaba) o‘zib ketishga muvaffaq bo‘ldi.
Monte-Karlodagi g‘alaba Yannikka yana Professional tennischilar assotsiatsiyasi (ATP) reytingida peshqadamlikni qaytarib beradi. U Karlos Alkarasni birinchi pog‘onadan tushirib yuboradi. Onlayn-reytingda italiyalik tennischi hisobida 13 400 ochko mavjud bo‘lsa, ispaniyalik sportchi 13 240 ochkoga ega bo‘lib turibdi.
