Янги Рим Папаси — Элдор Шомуродовнинг мухлиси
Папа Лев XIV футбол ишқибози бўлиб чиқди: у «Рома»ни қўллаб-қувватлайди, Элдор Шомуродовнинг ўйинларини кузатади ва Франциск мўъжизалари ҳақида ҳазил қилади. Янги сайланган Рим Папаси Роберт Фрэнсис Прэвост, Лев XIV исмини қабул қилганидан сўнг, нафақат маънавий раҳбар, балки спорт мухлиси экани ҳам маълум бўлди. Бу ҳақда Папани 40 йилдан бери танийдиган отец Жузеппе Пагано маълум қилди. Унинг сўзларига кўра, понтифик анча йиллардан бери Италиянинг «Рома» клубига мухлислик қилади.
«Мен у билан “Рома” — “Фиорентина” ўйинидан кейин гаплашдим. У ҳазил билан: “Романинг ғалабалари Франциск вафотидан кейинги биринчи мўъжизадир”, деди», — дея айтди Пагано италиялик журналистларга.
Фанатларнинг таъкидлашича, Папа ўзбек ҳужумчиси Элдор Шомуродовга алоҳида эътибор қаратиши мумкин. У жорий мавсумда «Рома» сафида яхши ўйинлар кўрсатмоқда ва мухлислар орасида катта эҳтиром қозонган. Расмий изоҳ берилмаган бўлса-да, кўпчилик Шомуродов ўзининг кутилмаган, аммо нуфузли бир мухлиси —Рим Папасига эга бўлганини истисно қилмаяпти.
