Ямал «Барселона» билан бешинчи совринини қўлга киритди. Месси унинг ёшида иккита совринга эга чиққанди
«Барселона» вингери Ламин Ямал каталонияликлар сафидаги бешинчи совринини қўлга киритди. Испания Суперкубоги финалида «кўк-анорранглилар» Мадриднинг «Реал» клубини 3:2 ҳисобида мағлуб этди.
Учрашув Саудия Арабистонининг Жидда шаҳридаги «King Abdulla Sports City» стадионида бўлиб ўтди. Беллашувни бош ҳакам Хосе Мунуэра Монтеро бошқарди.
Ламин Ямал ушбу ютуқни 18 ёш 182 кунлик пайтида қўлга киритди. Таqqослаш учун, «Барселона»нинг собиқ ҳужумчиси Лионел Месси шу ёшга келиб каталонияликлар сафида атиги икки совринга эга бўлган: Ла Лига (2004/2005) ва Испания Суперкубоги (2005).
Шу тариқа, «Барселона» ўз тарихида 16-марта Испания Суперкубогини қўлга киритди. Ўтган мавсум финалида ҳам «блауграна» «Реал» устидан йирик — 5:2 ҳисобида ғалаба қозонганди.
