“Вулверҳемптон” 18 ёшли футболчиси учун икки гранд таклифини рад этди
“Вулверҳемптон” ёзги трансфер ойнасида 18 ёшли Матеуш Мане бўйича “Ливерпуль” ва “Манчестер Юнайтед”дан тушган қизиқишни рад этди. TEAMtalk маълумотига кўра, “бўрилар” ёш футболчини ҳозирча сотиш ниятида эмаслигини икки клубга ҳам билдирган.
Англия грандлари трансфер ойнасининг сўнгги кунларида Мане бўйича музокара олиб борган. “Ливерпуль” футболчини тўлиқ сотиб олиш, шунингдек, трансфердан кейин уни яна “Вулверҳемптон”да ижарада қолдириш вариантларини ҳам кўриб чиққан.
Маненинг ўзи юқори даражадаги клубга ўтиш имкониятига қарши бўлмаган, бироқ “Вулверҳемптон” раҳбариятидан трансфер талаб қилмаган. Клуб эса футболчини жорий мавсумдаги муҳим лойиҳаларидан бири сифатида сақлаб қолишга қарор қилган.
Маълумот учун, 18 ёшли португалиялик вингер жорий мавсум барча мусобақаларда 6 та учрашувда майдонга тушган. Унинг бозор қиймати Transfermarkt томонидан 20 миллион еврога баҳоланмоқда.
