Водий дербиси олдидан ким қандай фикрда? Собиқ футболчи, ёшлар жамоаси футболчилари ва мухлислардан фикрлар
Бир неча дақиқалардан сўнг Фарғонадаги “Истиқлол” ўйингоҳида суперлиганинг 4-туридан ўрин олган “Нефтчи” ҳамда “Навбаҳор” жамоалари ўртасидаги тўқнашув бўлиб ўтади. Ушбу баҳс олдидан футболчилар ва мухлисларнинг фикрлари билан қизиқдик
“Нефтчи” ва “Навбаҳор” шарафини ҳимоя қилган собиқ футболчи ва бугунги кунда Наманган шаҳридаги футбол мактабларидан бирида директор бўлиб фаолият юритаётган мутахассис Санжар Асқаралиев:
“Бугунги учрашув қизиқарли бўлишини кутяпман. Хар икки жамоа таркибида ўйнаганман, лекин “Нефтчи”да ўн йил ўйнадим. Кўп йиллар жамоа сардори бўлдим, шунинг учун ҳам Фарғона ватандек бўлиб кетган. Менимча, бугунги учрашувда жанговар дурранг қайд этилиши керак”,-дейди собиқ 23 рақам эгаси.
“Навбаҳор” ўринбосарлар жамоаси футболчиси Миршавкат Мирёқубов:
“Бугунги ўйин ҳақида гапирадиган бўлсак, “Навбаҳор”ни устунлик билан ғалаба қозонишини кутяпман. Жамоада кайфият аъло даражада. Машғулотларда ҳамма борини бериб меҳнат қилди, Худо хоҳласа бу ўз натижасини кўрсатади”,-дейди футболчи
“Нефтчи” ўринбосарлар футболчиси Омадилло Абдубаннопов:
“Бугун “Нефтчи” ғалаба қозонишини кутяпман. Жамоамиз 2:0 ҳисобида бугунги ўйинни ўз фойдасига ҳал қилади”,-дейди ёш футболчи
Файзулло Абдуллаев “Навбаҳор” футбол клуби мухлиси:
“Бугунчи баҳсдан энг камида дурранг кутяпман. Агар Сергей Лушан заҳира таркибини алмаштиришда устунроқ келса, ғалаба насиб қилса “Навбаҳор”да бўлади. Менимча ўйин тақдири иккинчи бўлимда ҳал бўлса керак”,-дейди “лочинлар” мухлиси
Ҳикматилло Ҳакимов “Нефтчи” футбол клуби мухлиси:
“Бугун шиддатли ўйин бўлишини кутяпман. Ҳаммасини майдонда томоша қиламиз. Хар икки жамоа ўртасида жанг бўлиши аниқ”,-дейди “буюк чинарлар” мухлиси
Бугунги водий дербисини томоша қилиш учун минглаб наманганлик мухлислар Фарғона шаҳрига жўнаб кетишган. Фарғонада эса хар доим мухлислар билан тўла бўлган. Шулардан келиб чиқиб ҳам, “водий дербиси”да мухлислар ўртасида ҳам ўзгача кураш бўлиши турган гап
Эслатиб ўтамиз, “Нефтчи” – “Навбаҳор” учрашуви Фарғона шаҳридаги “Истиқлол” ўйингоҳида соат 19:30да бошланади.
