Влахович жароҳат олди ва номаълум муддатга сафдан чиқди
«Ювентус» ҳужумчиси Душан Влахович жароҳати туфайли узоқ муддат майдонга чиқа олмаслиги мумкин. Бугун, 1 декабрь куни туринликлар клуби расман сербиялик футболчида жароҳат аниқланганини маълум қилди.
Жамоа баёнотига кўра, Влаховичнинг чап оёғидаги узун олиб кирувчи мушакнинг мушак-пай бирикмасида жиддий шикастланиш бор. Одатда бундай жароҳатлар узоқ тикланишни талаб қилади.
Футболчи А Серия 13-туридан ўрин олган «Ювентус» — «Кальяри» учрашувида жароҳат олган эди. 2:1 ҳисобидаги ғалаба билан якунланган ўша баҳсда ҳужумчини 31-дақиқадаёқ алмаштиришга тўғри келган.
Бундай жароҳатларда тикланиш муддати одатда уч ойдан беш ойгача давом этади. Яқин кунларда ўтказиладиган қўшимча тиббий текширувлар Душан Влаховичнинг даволаниш режасини аниқлаб беради.
Унда жараённи консерватив усулда давом эттириш ёки жарроҳлик амалиётининг зарурлиги масаласи ҳам кўриб чиқилади. Сербиялик футболчининг майдонга қайтиш санаси текширувлар натижаси ва соғайиш динамикасига қараб белгиланади.
