Витинья: «Бизда кучли жамоа бор, лекин турнирда фаворит эмас»
Португалия терма жамоаси ярим ҳимоячиси Витинья миллий жамоанинг 2026 йилги жаҳон чемпионатидаги имкониятлари ҳақида фикрлари билан ўртоқлашди.
«Бизда дунёнинг энг яхши клубларида тўп сурадиган кўплаб иқтидорли футболчилардан иборат юқори савиядаги терма жамоа борлигини биламиз. Шунинг учун, ҳатто бизда ҳали ҳеч қачон бундай терма жамоа бўлмаган, дея оламан. Аммо қоғозда бу ҳеч нарсани англатмайди. Айтган бўлардимки, биз даъвогарлармиз, бизда жуда кучли терма жамоа бор, лекин фаворит эмас; мен бундай сўзларни ишлатмаган бўлардим. Буни ёдда тутиш керак. Бизда катта салоҳият бор ва уни рўёбга чиқариш керак.
Муваффақият гарови камтар бўлиш, ўйиндан-ўйинга ҳаракат қилиш, узоқни эмас, балки яқин келажакда бизни нима кутаётганини ўйлаш эканлигини биламиз. Бизда иқтидор бор. Биз катта фидойилик ва ишга содиқликни намоён этишимиз керак. Булар яхши натижага эришиш учун мукаммал таркибий қисмлардир. Биз айнан шуни қилишга ҳаракат қиламиз. Бизга берилаётган баҳони хотиржам қабул қиламиз, лекин агар майдонда қилишимиз керак бўлган ишни қилмасак, бу ҳеч нарсани англатмайди.
Ҳаммаси муваффақиятли бўлиши учун қўлимиздан келганини қиламиз.
Жаҳон чемпионатидаги ғалаба Чемпионлар лигасидаги ғалабадан кўра ўзига хосроқ бўладими? Бу бошқа нарса, лекин, албатта, терма жамоа билан энг муҳим совринни, кейин эса Миллатлар лигасини ютиш — жуда ўзига хос ҳодиса», — дея Витиньянинг сўзларидан иқтибос келтиради A Bola.