Виталий Левченко: \"Ҳеч ким кутмаган жамоалар юқорида, фаворитлар эса ўзининг ўрнида эмас. 6-7 турдан сўнг, чемпионлик пойгаси ҳақида хулоса қилиш мумкин\"
Водий дербисидан сўнг, “Нефтчи” жамоаси бош мураббийи Виталий Левченко матбуот анжуманида қуйидагича фикрларни билдириб ўтди:
"Дербининг қийин ўтишини олдиндан кутгандик ва амалда ҳам шундай бўлди. “Навбаҳор” яхши жамоа ва бугун шунга яраша муносиб ўйин кўрсата олди. Ҳисобда икки бор олдинга чиқиб олди. Лекин йигитлар ирода кўрсатишди ва 12-футболчимиз бўлган мухлисларга ғалабани тортиқ этишди. Ишқибозлар бундан хурсанд бўлишди, деб ўйлайман.
Биз керакли позицияларда алмаштиришларни амалга оширдик. Ўйинни кучайтириш, олдинги чизиқда босимни ошириш кераклигини тушуниб тургандик, чунки икки бор ҳисобда орқада қолдик. Биз ўз майдонимизда ўйнадик ва фақат ғалабани ўйладик. Майдонга тушган барча футболчилар борларини беришди.
Чемпионат ёки кубок деб ажратмаймиз. Ҳар бир жамоа учун ушбу мусобақалар муҳим ҳисобланади. Ҳозирда футболчилардан ким кучли бўлса, ўша майдонга тушади, биз вазиятдан келиб чиқиб, ротация қиламиз. Биз иккита турнирда ўйнаймиз. Ҳамма жамоалар таркибга маҳоратли футболчиларни қўшиб оляпти. Ўткинчи ўйинлар йўқ. Ҳар бир жамоа очко олишга астойдил ҳаракат қилмоқда. Ҳозирча чемпионат бошланишида ким чемпионлик учун курашиши ҳақда гапириш қийин. Ҳеч ким кутмаган жамоалар юқорида, фаворитлар ўзининг ўрнида эмас. 6-7 турдан сўнг, жамоаларнинг ҳолатига қараб, бу ҳақда хулоса қилиш мумкин",-дейди Левченко
