Винисиус Эл-Класикони ўтказиб юбориши мумкин — сабаби маълум
Мадриднинг «Реал» клуби ҳужумчиси Винисиус Жуниор Испания чемпионатининг 10-туридан ўрин олган «Барселона»га қарши учрашувда майдонга тушмаслиги мумкин. Бразилиялик футболчига «Вильярреал»га қарши баҳсда олган қизил карточкаси сабаб бир нечта ўйинлик дисквалификация хавф солмоқда. Бу ҳақда журналист Марио Кортегана хабар бермоқда.
Манбага кўра, Винисиус камида иккита учрашувга дисквалификация қилиниши кутилмоқда. Бундан ташқари, ҳакам қизил карточка кўрсатганидан кейин футболчининг тажовузкор муносабати туфайли жазо муддати учта ўйингача узайтирилиши мумкин. Бразилиялик ҳужумчи «Вильярреал»га қарши ўйинда рақибини сочидан тортгани учун майдондан четлатилган эди.
«Реал» раҳбарияти Винисиуснинг Эл-Класикода иштирок этиш эҳтимолини паст баҳоламоқда. Агар футболчи икки учрашувга дисквалификация қилинса, у «Севилья» ва «Барселона»га қарши баҳсларни ўтказиб юборади. Ҳозирча якуний жазо муддати расман эълон қилинмаган.
Маълумот учун, «Реал» 10 октябр куни Ла Лиганинг 8-турида «Вильярреал»ни 1:0 ҳисобида мағлуб этди. Винисиус мазкур учрашувнинг 71-дақиқасида гол урган, бироқ VAR текширувидан кейин гол бекор қилиниб, футболчига қизил карточка кўрсатилган. Мадридликлар 18 октябр куни «Севилья», 25 октябрда эса «Барселона»га қарши майдонга тушади.
