Винисиус Дрогбанидан ўтиб, Садио Манега етиб олди
Мадриднинг «Реал» клуби ҳужумчиси Винисиус Жуниор Чемпионлар Лигасининг 1/8 финали доирасида «Манчестер Сити»га қарши кечган жавоб учрашувида дубл қайд этди. Мазкур ўйиндаги голлари эвазига бразилиялик футболчи ушбу нуфузли мусобақадаги голлари сонини 15 тага етказди.
Opta нашри тақдим этган маълумотларга кўра, Винисиус европалик бўлмаган футболчилар орасида Чемпионлар Лигасида урилган голлар сони бўйича «Челси»нинг собиқ афсонаси Дидье Дрогбани (14 та гол) ортда қолдирди. Ҳозирда у ушбу кўрсаткич бўйича «Ливерпуль»нинг собиқ ҳужумчиси Садио Мане билан тенглашиб олди. Мазкур рейтингда пешқадамлик ҳамон «Барселона»нинг собиқ юлдузи Лионель Мессига тегишли бўлиб, унинг ҳисобида 49 та гол мавжуд.
Эслатиб ўтамиз, «Реал» ва «Манчестер Сити» ўртасидаги жавоб баҳси 2:1 ҳисобида мадридликларнинг ғалабаси билан якунланди. Биринчи ўйинда қайд этилган 3:0 ҳисобдаги устунликни ҳам ҳисобга олганда, «қироллик клуби» умумий 5:1 ҳисоби билан чорак финалга йўлланма олди. «Реал» плей-офф босқичида «Бенфика»ни (3:1) мағлуб этган эди. «Манчестер Сити» эса мусобақанинг умумий босқич босқичини 16 очко билан саккизинчи ўринда якунлаган эди.
Жорий мавсумдаги Чемпионлар лигасининг финал баҳси 2026 йил 30 май куни Будапештдаги «Пушкаш Арена» стадионида бўлиб ўтиши белгиланган.
