Винисиус аҳолининг тинчлигини бузгани учун жазоланиши мумкин
Бразилия миллий жамоаси ва Мадриднинг «Реал» клуби ҳужумчиси Винисиус Жуниор Рио-де-Жанейрода туғилган кунини нишонлаш учун ташкил этган шовқинли кеча сабаб фуқароларнинг тинчлигини бузганликда айбланмоқда. Бу ҳақда Mundo Deportivo нашри хабар берди.
Манбага кўра, суд кичик ҳуқуқбузарликлар бўйича ишни кўриб чиқади. Айблов Винисиус яшайдиган маҳалладаги қўшнининг шикоятига асосланган.
Daily O Globo нашрининг ёзишича, футболчи ўзининг 25 ёшини нишонлаш учун йирик тадбирлар — тўй ёки корпоратив кечалар ўтказиладиган ҳашаматли қароргоҳда байрам уюштирган. Бироқ тадбир давомида баланд мусиқа ва шовқин атрофдаги аҳолининг тинчини бузган.
Қўшни полицияни чақирган, ҳуқуқ-тартибот идоралари вакиллари эса Винисиус ва меҳмонлардан мусиқанинг овозини пасайтиришни сўраган. Футболчи уларнинг талабига рози бўлган, аммо полиция кетгач, кеча яна давом этган.
Маълум қилинишича, ушбу иш бўйича дастлабки суд 6 ноябрь куни бўлиб ўтади. Бразилия қонунчилигига кўра, фуқароларнинг тинчлигини бузиш учун 15 кундан 3 ойгача озодликдан маҳрум этиш ёки жарима жазоси белгиланган.
