Вьетнам уруши фахрийлари ва фаоллар «Оқ уй»да бўлиб ўтадиган UFC 250 турнирини бекор қилиш талаби билан судга даъво киритишди
Вьетнам уруши фахрийлари ва жамоат фаоллари АҚШ президенти қароргоҳи Жанубий майсазорида 14 июн куни ўтказилиши режалаштирилган UFC Freedom 250 турнирини тақиқлаш талаби билан судга мурожаат қилишди.
Даъвогарлар — виржиниялик уруш фахрийси Пол Романо ҳамда фаол Сюзан Дуглас ушбу тадбирни тубдан коррупциялашган деб ҳисобламоқда. Уларнинг фикрича, мамлакат президенти Дональд Трамп UFC ташкилоти ва унинг раҳбари Дана Уайтга «шахсий тижорат спорт тадбирини ўтказиш учун Оқ уй ҳамда Линкольн мемориалига тўсиқсиз кириш ҳуқуқини тақдим этган». Норозилар федерал ер майдонида ташкил этилаётган ушбу жанглар оқибатида UFC улкан миқдорда даромад кўриши ва бу ҳолат амалдаги қонунчиликка зид эканини таъкидлашмоқда.
«Президент Американинг энг муқаддас саналган иккита ёдгорлигини шахсий корпорацияга топширди, токи у ва унинг иттифоқчилари бундан бойлик орттиришсин. Бу — коррупция. Ушбу обидалар Дана Уайтга, Crypto.com каби ҳомийларга ёки Дональд Трампга эмас, балки барча америкаликларга тегишли. Маъмурият қонунни бажаришдан бош тортар экан, биз суддан қонун устуворлигини таъминлашни сўраймиз», — дея Дугласнинг сўзларини келтирмоқда MMA Junkie нашри.
Мазкур суд даъвоси «Public Integrity Project» жамоат ташкилоти томонидан ҳам расман қўллаб-қувватланмоқда.