“Вест Хэм” афсонаси Людек Миклошко 64 ёшида вафот этди
“Вест Хэм”нинг собиқ дарвозабони Людек Миклошко 64 ёшида вафот этди. Чехиялик собиқ футболчининг ўлими ҳақида унинг оиласи ва Лондон клуби маълум қилди. Миклошко бир неча йил давомида оғир касаллик билан курашиб келган.
Миклошко 1990-йилда “Баник Острава”дан “Вест Хэм”га ўтган ва Лондон клуби сафида саккиз йил давомида 373 та учрашув ўтказган. У қисқа вақт ичида мухлисларнинг севимли футболчиларидан бирига айланган, 1991-йилда эса клубнинг йил футболчиси деб топилган.
Дарвозабон фаолиятидаги энг эсда қоларли учрашувлардан бири 1994/95-йилги мавсумнинг сўнгги турида “Манчестер Юнайтед”га қарши кечган. Миклошконинг сейвларидан сўнг баҳс 1:1 ҳисобида якунланган ва бу натижа “Блэкберн”нинг тарихидаги илк Премьер-лига чемпионлигини қўлга киритишига ёрдам берган.
Маълумот учун, Миклошко Чехословакия ва кейинчалик Чехия терма жамоалари сафида жами 42 та учрашув ўтказган. Унга 2021-йилда саратон ташхиси қўйилган, 2024-йилда эса кимётерапияни тўхтатишга қарор қилган эди.
