Вейналдум фаолиятини АҚШда давом эттириши мумкин
Нидерландиялик тажрибали ярим ҳимоячи Жоржиньо Вейналдум фаолиятини АҚШнинг МЛС чемпионатида давом эттириши мумкин.
35 ёшли футболчи «Реал Солт-Лейк» клуби билан музокаралар ўтказган. Томонлар эҳтимолий трансфер бўйича мулоқот қилган, Вейналдум эса Америка клуби ҳақида ижобий таассурот олган ва МЛСга ўтишга қарши эмас. Бироқ ҳозирча келишув тузилгани йўқ.
Вейналдум ҳозир эркин агент ҳисобланади. У Саудия Арабистонининг «Ал-Иттифоқ» клубини тарк этганидан кейин янги жамоа изламоқда.
Нидерландия терма жамоаси собиқ футболчиси фаолияти давомида «Фейеноорд», ПСВ, «Ньюкасл», «Ливерпуль», «ПСЖ», «Рома» ва «Ал-Иттифоқ» клубларида ўйнаган. Айниқса, «Ливерпуль» сафидаги беш мавсум унинг фаолиятидаги энг ёрқин даврлардан бири бўлган. У мерсисайдликлар билан Англия чемпионати ва Чемпионлар лигасида ғолиб чиққан.
