Ван де Вен фаолиятини «МЮ»да давом эттириши мумкин
«Тоттенхэм» ҳимоячиси Микки ван де Вен ёзги трансфер ойнасида «Манчестер Юнайтед» футболчисига айланиши мумкин. Daily Mail нашрининг хабар беришича, «манкунианликлар» 25 ёшли футболчи атрофидаги вазиятни диққат билан кузатиб боришмоқда.
«Қизил иблислар» ҳимоячининг юқори тезлиги, тўп билан ишлаш маҳорати ва курашларга киришиш қобилиятини алоҳида эътироф этмоқда. Эътиборли жиҳати шундаки, футболчининг «шпорлар» билан шартномасида уни сотиб олиш мумкин бўлган аниқ товон пули белгиланмаган.
Микки ван де Вен 2023 йилда Германиянинг «Вольфсбург» клубидан 40 миллион евро эвазига «Тоттенхэм»га кўчиб ўтган эди. Ўша вақтдан буён у Лондон клубининг асосий таркиб ўйинчисига айланди. Футболчининг ҳозирги шартномаси 2029 йилнинг ёзига қадар мўлжалланган бўлиб, бу «Тоттенхэм»га музокараларда устунлик беради.
Жорий мавсумда нидерландиялик ҳимоячи барча турнирларда 40 та учрашувда майдонга тушиб, ҳимоячи учун жуда юқори кўрсаткич — 7 та гол ва 1 та голли узатмани амалга оширди. Transfermarkt портали маълумотларига кўра, унинг айни пайтдаги бозор қиймати 65 миллион еврони ташкил этмоқда.
