Вальверде: «Ростини айтаман, анчадан бери бунчалик яхши футбол ўйнамаган эдим»
«Реал» яримҳимоячиси Федерико Вальверде Чемпионлар Лигасининг 1/8 финали доирасида «Манчестер Сити» дарвозасига киритган хет-триги (3:0) ва жамоасининг йирик ғалабаси юзасидан ўз фикрларини билдирди. УЕФА расмий сайти орқали келтирилган интервьюда уругвайлик футболчи қуйидагиларни таъкидлади:
«Бу шунчаки фантастик оқшом бўлди! Ҳар бир футболчи шундай натижани орзу қилади. Ортимда жуда ишончли ўйин кўрсатган ва менга куч ҳамда ишонч бағишлаган жамоадошларимдан жуда миннатдорман. Шунингдек, мавсум давомида бизга йўл кўрсатиб келаётган мураббийлар штабигa ҳам ўз ташаккуримни билдираман».
Вальверде ўз фаолиятидаги энг яхши ўйинни ўтказганини тан олди:
«Агар голлар сони ҳақида гапирадиган бўлсак, шубҳасиз, бу менинг фаолиятимдаги энг яхши ўйин! Мен майдонда ҳақиқий завқ олдим, ростини айтаман, анчадан бери бунчалик яхши футбол ўйнамаган эдим. Мен бахтлиман, аммо энг муҳими — жамоамизнинг ғалабаси».
У мураббийнинг тактикасига ҳам тўхталиб ўтди:
«Мураббий айнан ҳужумда фаол бўлишимни, олдинга интилишимни ва кескин вазиятларни яратишимни сўраган эди. Бу менга ҳужум чизиғида кўпроқ эркинлик берди. Жамоадошларим эса ажойиб узатмалар билан таъминлашди».
Вальверде жавоб ўйини олдидан хотиржамликни сақлаш муҳимлигини таъкидлади:
«Биз дарвозадан амалга ошириладиган узоқ масофали узатмаларга алоҳида эътибор қаратдик. «Сити» юқори прессинг қўллашни ёқтиради, бу эса уларнинг ортида бўш зоналар пайдо бўлишини англатади. Биз майдонда бир тану бир жон бўлиб ҳаракат қилишимиз керак. Манчестердаги учрашувлар ҳар доим оғир кечади, шунинг учун у ерга худди ҳисоб 0:0 бўлиб турганидек, катта масъулият билан борамиз».
