Усман Дембеле «Арсенал»га қарши майдонга тушади
«ПСЖ» ҳужумчиси Усман Дембеле Лондоннинг «Арсенал» клубига қарши бўлиб ўтадиган Чемпионлар Лигаси 2025/2026 йилги мавсум финал учрашувида майдонга туша олишини тасдиқлади. Ушбу муҳим баҳс 30 май куни ўтказилади. Аввалроқ франциялик футболчи Франция чемпионатининг 34-туридан ўрин олган «Париж»га қарши ўйинда (1:2) жароҳат олиб, 27-дақиқадаёқ майдонни тарк этган эди.
«Ҳаммаси жуда яхши кетяпти. «Париж» билан ўйинда бироз қўрқиб кетгандим, лекин ҳозир аҳволим жойида ва финалда ўйнайман. 100 фоиз тайёр бўламанми? Ҳа, шундай бўлса керак. Бунга шубҳам йўқ, 30-май куни майдонга тушишдан умидворман.
Фаолиятимда, хоҳ «ПСЖ»да бўлсин, хоҳ ундан олдин, айниқса муҳим ўйинлар олдидан кўплаб майда ва жиддий жароҳатлар бўлган. Шу сабабли финал олдидан таваккал қилмасдан, ўйинни тўхтатишни афзал кўрдим», — дея Дембеленинг сўзларини келтиради RMC Sport.
Маълумот учун, Дембеле жорий мавсумда барча турнирларда 39 та учрашувда майдонга тушиб, ўз ҳисобига 19 та гол ва 11 та голли узатма ёздириб қўйишга улгурди.
