Уортон: «Ҳис-туйғуларни сўз билан ифодалаб бўлмайди»
Англиянинг «Кристал Пэлас» клуби ярим ҳимоячиси Адам Уортон Конференциялар лигаси финалида Испаниянинг «Райо Вальекано» жамоаси устидан қозонилган ғалаба (1:0) ҳақида фикр билдирди.
«Ўтган йили Англия Кубогидан кейинги байрамни ўтказиб юборгандим, шунинг учун бу сафар албатта ўрнини тўлдираман. Ҳис-туйғуларни сўз билан ифодалаб бўлмайди. Бунинг жанубий Лондон учун, мухлислар учун нимани англатишини кўриб турибсиз-ку. Бу ақлбовар қилмас ҳолат.
Ҳимояни ёриб ўтиш қийин бўлишини билардик. Бу жуда яхши тайёргарлик кўрган жамоа. Испанияда у энг меҳнаткаш ва мақсад сари интилувчан жамоалардан бири ҳисобланади. Ўйин бошланиши, финалларда доимгидек, анча эҳтиёткорона ўтди, аммо аста-секин ўз ритмимизга тушиб олдик.
Кўпроқ гол уриб, вазифамизни енгиллаштиришимиз керак эди, лекин шундоқ ҳам уддаладик», — дея Уортоннинг сўзларини келтиради УЕФА расмий сайти TNT Sports’га таяниб.
