Украина терма жамоаси Испанияда ўғирланди
ЖЧ-2026 саралаш плей-офф босқичи яримфиналида Швецияга қарши (1:3) баҳс олдидан Украина терма жамоаси Испанияда ўғирлик қурбони бўлди. Бу ҳақда The Sun нашри хабар бермоқда.
Ўғрилар Украина терма жамоаси Бенидорм шаҳрида ҳал қилувчи ўйинга тайёргарлик кўраётган вақтда меҳмонхонага бостириб киришган. Футболчилар ўз хоналаридан бир неча минг евро қимматбаҳо соатлар, ҳашаматли буюмлар ва нақд пуллар йўқолганини кўриб, қаттиқ тушкунликка тушиб қолишган.
Ушбу нохуш ҳодисадан сўнг ўтказилган баҳсда Швеция ғалаба қозониб, плей-оффнинг финал босқичига йўлланма олди ва у ерда Польша билан тўқнаш келади.
Эслатиб ўтамиз, 2026 йилги Жаҳон чемпионати келаси ёзда учта мамлакат — АҚШ, Канада ва Мексика ҳудудида бўлиб ўтади. Амалдаги жаҳон чемпиони Аргентина ҳисобланади. 2022 йилги финалда аргентиналиклар Франция билан баҳсда (асосий вақт 3:3) пенальтилар сериясида (4:2) зафар қучишган эди.
