Украина Польша билан биргаликда Жаҳон чемпионатини ўтказмоқчи
Украина ва Польша келажакда футбол бўйича Жаҳон чемпионатини биргаликда қабул қилиш имкониятини кўриб чиқмоқда. Украина спорт вазири Матвий Биднийнинг маълум қилишича, Киев FIFA томонидан мезбон ҳали белгиланмаган навбатдаги мундиаль учун Польша билан қўшма ариза топширишга қизиқмоқда.
Вазирнинг айтишича, ҳозирги тақвимдан келиб чиқиб, Жаҳон чемпионатини қабул қилиш учун энг яқин бўш имконият 2040-йилларга тўғри келиши мумкин. Шу сабаб Украина бу масалани ҳозирданоқ узоқ муддатли лойиҳа сифатида режалаштиришни истамоқда. Польша томони ҳам мазкур имкониятни муҳокама қилаётгани айтилмоқда.
Бидний икки давлатнинг бундай йирик турнирни биргаликда ташкил этиш тажрибаси борлигини эслатди. Украина ва Польша 2012-йилги Европа чемпионатига ҳамкорликда мезбонлик қилган. Унинг фикрича, келажакдаги Жаҳон чемпионати учун ҳам шу моделни такрорлаш мантиқан тўғри бўлади.
Маълумот учун, 2030-йилги Жаҳон чемпионатининг асосий мезбонлари Испания, Португалия ва Марокаш, 2034-йилги мундиаль эса Саудия Арабистонида ўтказилади.
