УЕФА Винисиусни ҳақорат қилганликда айбланган Престианнини номаълум муддатга дисквалификация қилди
УЕФА Чемпионлар Лигаси плей-офф босқичи доирасидаги «Реал Мадрид»га қарши учрашувдан сўнг, Винисиус Жуниорга нисбатан ирқчиликда айбланган «Бенфика» яримҳимоячиси Жанлука Престианнига нисбатан расмий чора кўрилди.
Ташкилот баёнотига кўра, аргентиналик футболчи суриштирув ишлари якунлангунига қадар вақтинча дисквалификация қилинди.
«УЕФА Назорат, этика ва интизом органи бугун Жанлука Престианнини камситувчи хатти-ҳаракатлар билан боғлиқ бўлган УЕФА Интизом регламентининг 14-моддасини қўпол равишда бузгани учун УЕФА байроғи остидаги навбатдаги клуб учрашувидан вақтинча четлатиш ҳақида қарор қабул қилди.
Ушбу қарор давом этаётган расмий тергов якунланганидан сўнг УЕФА интизом органлари томонидан қабул қилиниши мумкин бўлган якуний ҳукмга ҳеч қандай таъсир кўрсатмайди», — дейилади УЕФА расмий баёнотида.
Эслатиб ўтамиз, ушбу вақтинчалик жаза Престианнининг жавоб ўйинида майдонга туша олмаслигини англатади. УЕФА мутахассислари барча далилларни (видео ва аудио материаллар) ўрганиб чиққанидан сўнг, футболчининг айби исботланса, унга нисбатан янада узоқ муддатли — 10 та ўйингача четлатиш жазоси қўлланилиши мумкин.
