UEFA “Манчестер Сити”га қарши янги иш очиши мумкин
Европа футбол ассоциациялари иттифоқи (UEFA) Англиянинг “Манчестер Сити” клубига қарши молиявий қоидабузарликлар юзасидан янги тергов бошлаши мумкин. Бунга клубнинг молиявий фаолияти билан боғлиқ ишда юзага келган сўнгги вазият сабаб бўлмоқда. Бу ҳақда Mirror нашри хабар бермоқда.
Манбага кўра, мустақил комиссия “Манчестер Сити”ни кўплаб молиявий қоидабузарликларда айбдор деб топгани ҳақидаги хабарлардан сўнг UEFA вазиятни диққат билан кузатмоқда. Аввалги текширув давомида Европа футбол ташкилоти Англия Премьер-лигаси ихтиёрида бўлган айрим далилларга эга бўлмаган.
Ҳозирда UEFA клубнинг апелляция жараёнини кузатиб бормоқда. Агар “Манчестер Сити” апелляцияда ҳам мағлубиятга учраса, ташкилот клубга қарши янги иш очиши мумкин. Бироқ ҳозирча UEFA томонидан янги тергов бошлангани расман эълон қилинмаган.
Маълумот учун, 2020 йилда UEFA “Манчестер Сити”ни молиявий қоидаларни бузганликда айблаб, клубни икки йилга Чемпионлар лигасидан четлатиш ҳақида қарор чиқарган эди. Бироқ кейинчалик Спорт арбитраж суди (CAS) ушбу жазони бекор қилган.
