UEFA хавфсизлик сабаб Еврокубок учрашувини бошқа шаҳарга кўчирди
UEFA Албаниянинг “Эгнатия” ва Даниянинг “Мидтюлланн” клублари ўртасидаги Конференциялар лигаси учрашувини бошқа стадионга кўчирди. Бунга Албания пойтахти Тиранада давом этаётган норозилик намойишлари сабаб бўлган. Бу ҳақда Reuters ахборот агентлиги хабар бермоқда.
Манбага кўра, учрашув дастлаб Тиранадаги “Арена Комбетаре” стадионида ўтказилиши керак эди. Бироқ шаҳардаги хавфсизлик вазияти инобатга олиниб, баҳсни Элбасан шаҳридаги аренага кўчиришга қарор қилинган.
Ушбу қарор UEFA томонидан маҳаллий мутасаддилар билан маслаҳатлашилган ҳолда қабул қилинган. Албания пойтахтида талабалар норозилиги ва бошқа ижтимоий намойишлар давом этмоқда. Ташкилотчилар футболчилар ҳамда мухлисларнинг хавфсизлигини таъминлашни устувор вазифа сифатида белгилаган.
Маълумот учун, Элбасан шаҳри Тиранадан тахминан 40 дақиқалик автомобиль йўлида жойлашган. “Эгнатия” ва “Мидтюлланн” ўртасидаги баҳс янги манзилда ташкил этилиши режалаштирилган. UEFA учрашув ўтказиладиган жойни ўзгартирган бўлса-да, бу қарор мусобақа натижаларига таъсир қилмайди.
