UEFA ФИФАга уруш эълон қилди
ФИФА Жаҳон чемпионатининг тижорий ҳуқуқларининг бир қисмини ташқи инвесторларга сотишни режалаштирмоқда. Бу эса Европа футбол ассоциациялари уюшмасининг кескин норозилигига сабаб бўлди. УЕФАга аъзо ассоциациялар шу ҳафта фавқулодда йиғилиш ўтказади. Агар ФИФА президенти Жанни Инфантино ушбу режани амалга оширишда давом этса, улар Жаҳон чемпионатини бойкот қилиш масаласини муҳокама қилиши мумкин.
УЕФА бу ташаббусни футбол бошқарувида ҳеч қачон кесиб ўтилиш керак бўлмаган “қизил чизиқ” деб баҳолади. Ташкилот баёнотида шундай дейилади: “Ҳеч биримиз футболга эгалик қилмаймиз. ФИФАнинг уни сотишга ҳаққи йўқ.”
Яна бир эътиборли жиҳати шундаки, бу режа 2026-йилги Жаҳон чемпионатидан олдин футбол ассоциациялари билан ўтказилган расмий учрашувларда умуман муҳокама қилинмаган. Ҳозирча УЕФА Жаҳон чемпионатини бойкот қилиш бўйича расмий қарор қабул қилгани йўқ. Бироқ ФИФА ушбу режадан воз кечмаса, футбол тарихидаги энг йирик можаролардан бири юзага келиши мумкин.
