УЕФА «Барселона»ни 30,5 минг евро миқдорида жаримага тортди
Шунингдек, каталонияликлар бош мураббийи Ҳанс-Дитер Флик ҳам огоҳлантирилди.
ФОТО: Getty Images
УЕФА ЕЧЛнинг умумий босқичи 7-туридан ўрин олган «Славия» — «Барселона» (2:4) учрашувидаги тартиббузарликлар учун каталонияликларни 30,5 минг евро миқдорида жаримага тортди. Бу ҳақда УЕФА маълумотига таяниб Mundo Deportivo хабар бермоқда.
Санкциялар қуйидагича тақсимланган:
- 15,5 минг евро — мухлислар томонидан майдонда файерлар ёқилгани учун;
- 15 минг евро — жамоанинг майдонга чиқишни кечиктиргани учун.
Таъкидланишича, учрашувнинг кечикиб бошланишига бош мураббий Ҳанс-Дитер Фликнинг ҳаракатлари сабаб бўлган. Шу сабабли УЕФА мураббийни расман огоҳлантирди. Агар бундай ҳолат яна такрорланса, Фликка нисбатан жиддийроқ жаза чоралари кўрилиши мумкин.
Эслатиб ўтамиз, ЕЧЛнинг умумий босқичи якунларига кўра, «Барселона» 16 очко жамғариб, турнир жадвалида бешинчи ўринни банд этди.
Насрулло Каримов
Журналист