Қудрат Худойқулов: \"Беш марта Жаҳон чемпиони бўлиш ниятим бор\"
Туркиянинг “Alves Koblo” клуби 2025 йилги мавсум Европа чемпионлар лигаси финалида Польшанинг “Visla Krakov” жамоасини 6:1 ҳисобида мағлуб этиб, қитъада тенгсиз эканлигини исботлади. Жамоа таркибида Ўзбекистон ампутантлар терма жамоаси аъзоси Қудрат Худойқулов ҳам фаолият юритади. Футболчи ушбу клубда 7 рақамда ҳаракат қилади.
“Alves Koblo” ампутантлар футбол жамоаси, Туркия футбол федерацияси томонидан қўллаб-қувватланадиган жисмоний имконияти чекланганлар спорт федерацияси таркибидаги ампутант футбол клубларидан бири ҳисобланади. Tribuna.uz Қудрат Худойқулов билан интервью ташкил қилди.
Қудрат Худойқулов қаерда, қандай оилада туғилиб ўсган?
-1990 йил 17 апрел куни Тошкент шаҳрида зиёлилар оиласида дунёга келганман.
Фаолиятингизни неча ёшда, қаерда бошлагансиз ва бунга нима туртки бўлган?
-Фаолиятимни етти ёшимдан бошлаганман. Ёшлигимдан футболга қизиқишим юқори бўлгани учун бу спорт турига киришиб кетганман.
Балким адашаётгандирман, лекин Ўзбекистонда ампутантлар ўртасидаги мунтазам давом этадиган лига йўқ ёки бўлмаса ОАВ томонидан етарлича ёритилмайди. Фаолиятингизни энди бошлаган даврларингизда мунтазам расмий ўйинларсиз, фақат машғулотларнинг ўзи билан қандай қилиб спорт формасини юқори даражада ушлаб туриш мумкин эди?
-Бир томондан бу гапингиз ҳам тўғри. Жуда паст назарда қарашади. Ўзи, деярли йўқолиб кетган десам ҳам бўлади. Уч-тўртта жамоа қолган. Булар: Самарқанд, Фарғона, Андижон, Тошкент шаҳри ҳамда Тошкент вилояти. Унда ҳам учинчи декабр ногиронлар кунида йиғилишади ва ушбу байрам куни бир йилда бир марта турнир ўтказилади.
Яқинда Европа чемпионлар лигасини иккинчи бор қўлга киритдингиз...
-Тўғри. 2021 йил “Шаҳинбей”да ўйнаб юрган пайтим, Европа чемпионлар лигасини биринчи марта қўлга киритганман. 2025 йили “Alves Koblo”га трансфер бўлиб, бу клуб билан яна бир бор ушбу совринни қўлга киритдим.
Туркия чемпионати дунёдаги энг кучли лигалардан бири ҳисобланади. У ердаги инфратузилма, шароитлар ҳамда профессионаллик ҳақида айтиб берсангиз
-Туркияда 2020 йилдан бери фаолият юритиб келмоқдаман. Туркияни профессионал деб айта олишимга бир неча сабаблар бор. Чунки, у ерда ўн тўртта клуб Суперлигада, ўнта жамоа биринчи лигада ва иккинчи лигада еттита клуб иштирок этади. Жадвал охиридаги икки клуб мавсум якунида қуйи лигага тушади ҳамда қуйи лигадаги пешқадам икки клуб юқори лигага ўтади. Ҳар ҳафтада битта ўйин бўлади. Бир сафар бизни уйимизда, бир сафар сафарда дам олиш кунлари учрашувларни ўтказамиз. Ҳафтада уч марта машғулотларда иштирок этамиз. Шунинг учун ҳам дунёнинг энг кучли лигаси Туркияда деб айта оламан ва Африка, Америка, шунингдек бошқа ер шарининг энг зўр ўйинчилари Туркия лигасида ўйнайди.
"Шаҳинбей" ва "Alves Kablo" жамоаларини "Real Madrid" ва "Барселона"га ўхшатиш мумкин. Сиз ҳар икки жамоада ҳам ўйнаб кўрдингиз. Бу икки клуб қайси томонлари билан бир-биридан фарқ қилади?
-Албатта, “Шаҳинбей” ва “Alves” профессионаллиги ва даражаси жиҳатидан “Барселона”-“Real Madrid”, “Манчестер Юнайтед”-“Манчестер Сити” қарама-қаршиликлари каби “класико”, ёки “дерби” мақомида бўлиб, Туркия дербиси ҳисобланади. Рақибни уйида дуранг ўйнадик ва ўз майдонимизда ютқазиб қўйдик, бироқ тўплар нисбатига кўра биринчи ўринда эдик. Бундан ташқари “Шаҳинбей” ҳамда “Alves Koblo” молиявий томондан ҳам ўзаро рақиб ҳисобланади. “Alves Koblo” иккиламчи, электр кабеллар билан шуғулланувчи тадбиркор инсонга тегишли хусусий клуб бўлса, “Шаҳинбей” ҳокимиятга тегишли жамоа ҳисобланади. Шунинг учун ҳам бу икки клуб энг яхши футболчиларни йиғиб олган.
Ҳозирда ампутантлар терма жамоамиздан яна кимлар Туркия чемпионатида ўйнаб келмоқда ва ўзбек футболчиларини Туркияда қандай даражада кўришади?
-Ҳозирги кунда битта ўзим Туркия лигасида ўйнаб келмоқдаман. Бу лига ҳозирда дунёда биринчи ўринда деб айта оламан. Олдин Азиз Абдураҳмонов, Ҳайдар Али Турсунбоевлар ҳам ўйнаб кетишган. Улар айни пайтда бошқа лигада ўйнаб юришган эди. Келаси мавсум икки ёш йигитлар Туркия лигасига легионер бўлиб қўшилиши кутилмоқда.
Икки карра чемпионлар лигаси, уч карра Жаҳон чемпиони, тўпурар, бир марта Осиё чемпиони, беш карра Туркия лигаси ғолиби каби кўплаб совринларни қўлга киритдингиз. Ўтиб бораётган фаолиятингиздан тўлиқ қониқяпсизми? Нима нарсалар ормон бўлиб қолди ва яна нималарни ҳали амалга ошириш учун вақт бор деб ўйлайсиз?
-Бир қарашда айтишга жуда ҳам осондек туюлади. 2007 йилги Жаҳон чемпионатидан бери шу спорт турида фаолият олиб бораман. 2007, 2010, 2012 йилларда Жаҳон чемпиони бўлганмиз. Икки карра Европа чемпионлар лигаси ғолиби бўлдим. Ўтган йили биринчи марта ўтказилган Осиё чемпионатида ғалаба қозондик. Нима десам бўлади, ормоним йўқ. Худога шукур қиламан. Кўп совринларни қўлга киритдим. Худо хоҳласа Бразилияга ўхшаб беш марта Жаҳон чемпиони бўлиш ниятим бор. Чемпионлар лигасини ҳам насиб қилса, кучим етса беш марта олишга ҳаракат қиламан.
Ниҳоят Ўзбекистон миллий терма жамоаси 2026 йилги Жаҳон чемпионати йўлланмасини қўлга киритди, бу ҳақида фикрларингиз? Жаҳон чемпионати биз учун нима беради?
-Миллий терма жамоа 2026 йилги Жаҳон чемпионати йўлланмасини қўлга киритди. Бу жуда ҳам қувончли лаҳзалар. Биз ҳам хурсандмиз. Биласиз, жуда узоқ йиллардан бери бу кунларни халқимиз кутуб яшади. Ўттиз тўрт йилдан бери Жаҳон чемпионатига чиқиш ормон бўлиб келаётган эди. Футболчиларимизнинг мундиалда тарихий учрашувларни ўтказишини кўришдан биз ҳам хурсанд бўламиз. Терма жамоамиз яхши натижаларни қайд этишини кутуб қоламиз.
Бу орада бизда ҳам Жаҳон чемпионати бўлиб ўтади. Ушбу турнир 2026 йили Коста Рика давлатида ўтказилади. Худо хоҳласа бу йил саралашда Осиё чемпионатидан кейин Осиёдан тўртта йўлланма берилган. Насиб қилса, келаси йил кузда Жаҳон чемпионати бўлиб ўтади.
Мундиалга тайёргарлик босқичини олиб бориш режалаштирилганми?
-Албатта. Ўқув-машғулот йиғинларида иштирок этишимиз режалаштирилган. Бу йиғинлар доирасида Марокаш, Туркия, Польша ҳамда Миср терма жамоаларига қарши тўртта ўртоқлик учрашувларини ўтказишга яқин турибмиз.