«У бундай даражадаги ўйинчи эмас» — ЦСКА афсонаси Файзуллаевнинг кетишига хурсанд
Москва ЦСКА жамоасининг собиқ ҳимоячиси Владимир Пономарёв Аббосбек Файзуллаевнинг Туркиянинг “Истанбул Башакшехир” клубига ўтиши ҳақидаги хабарларга муносабат билдирди. У ўз фикрларини журналистлар билан бўлишди.
Пономарёвнинг фикрича, бундай трансфер ЦСКА учун жиддий йўқотиш бўлмайди. Агар жамоа чемпионлик учун курашишни мақсад қилган бўлса, Файзуллаев бу даражадаги вазифаларни ҳал қиладиган футболчи эмаслигини таъкидлади.
— Ҳа, ўтсин, — деди Пономарёв нашр мухбирига. — Агар ЦСКА олтин медаллар учун курашмоқчи бўлса, у бундай даражадаги ўйинчи эмас. У топ-жамоа учун мос келмайди.
Футбол ветеранининг таъкидлашича, Файзуллаев майдонда фаол ҳаракат қилган бўлса-да, бу уни жамоадаги ҳал қилувчи шахсга айлантириш учун етарли эмас:
— Ҳа, бироз ҳаракат қилди, лекин бошқа оламшумул нарса йўқ.
Пономарёв Файзуллаевни Россиянинг ёш истеъдоди Сергей Пиняев билан таққослар экан, Пиняев ундан кўра қизиқарли ва истиқболли футболчи эканини қайд этди.
