“U bunday darajadagi o‘yinchi emas” — CSKA afsonasi Fayzullaevning ketishiga xursand
Moskva CSKA jamoasining sobiq himoyachisi Vladimir Ponomaryov Abbosbek Fayzullayevning Turkiyaning “Istanbul Bashakshehir” klubiga o‘tishi haqidagi xabarlarga munosabat bildirdi. U o‘z fikrlarini jurnalistlar bilan bo‘lishdi.
Ponomaryovning fikricha, bunday transfer CSKA uchun jiddiy yo‘qotish bo‘lmaydi. Agar jamoa chempionlik uchun kurashishni maqsad qilgan bo‘lsa, Fayzullayev bu darajadagi vazifalarni hal qiladigan futbolchi emasligini ta’kidladi.
— Ha, o‘tsin, — dedi Ponomaryov nashr muxbiriga. — Agar CSKA oltin medallar uchun kurashmoqchi bo‘lsa, u bunday darajadagi o‘yinchi emas. U top-jamoaga mos kelmaydi.
Futbol veterani ta’kidlashicha, Fayzullayev maydonda faol harakat qilgan bo‘lsa-da, bu uni jamoaning hal qiluvchi shaxsiga aylantirish uchun yetarli emas:
— Ha, biroz harakat qildi, lekin boshqa olamshumul narsa yo‘q.
Ponomaryov Fayzullayevni Rossiyaning yosh iste’dodi Sergey Pinyayev bilan taqqoslar ekan, Pinyayev undan ko‘ra qiziqarli va istiqbolli futbolchi ekanini qayd etdi.
