Тьяго Силва «Челси» мураббийлар штабида иш бошлаши мумкин
Ҳозирда у УЕФА B лицензиясини олиш устида иш олиб бормоқда.
ФОТО: Getty images
“Челси” собиқ ҳимоячиси Тьяго Силвани клуб мураббийлик ролига қайтариш имкониятини кўриб чиқмоқда. Бу ҳақда ESPN Brasil хабар берди.
Маълумотларга кўра, афсонавий ҳимоячи ҳали ҳам “Порту”ни тарк этиш қарори ортидан ўз вариантларини таҳлил қилмоқда. Унинг атрофидагилар таъкидлашича, якуний қарор ҳали қабул қилинмаган, “Челси”даги мураббийлик лавозими эса ҳозирча муҳокама босқичида. Силва клуб билан яхши муносабатларни сақлаб қолган.
Бразилиялик футболчи мураббийлик фаолиятини бошлаш ниятида бўлиб, УЕФА B лицензиясини олиш устида иш олиб бормоқда. Шунингдек, у “Челси”нинг Кобҳэмдаги машғулот базаси яқинидаги уйини ҳам сақлаб қолган.
Ҳозирча Тьяго Силва фаолиятини якунлаб, мураббийликка ўтадими ёки ўйинчи сифатида давом эттирадими — бу номаълум.
Розикжон Султонмуродов
Журналист
