Тьяго Моттага учта хориж клубидан таклиф бор
Италиялик мутахассис Тьяго Мотта мураббийлик фаолиятини тиклашга яқин турибди. 43 ёшли мутахассис хизматларига айни пайтда учта нуфузли клуб — «Лацио», «Лилль» ва Леверкузеннинг «Байер» жамоалари жиддий қизиқиш билдирмоқда. Таниқли инсайдер ва журналист Николо Скиранинг хабар беришича, Моттанинг катта футболга қайтиши келаётган янги мавсумдаёқ амалга ошиши мумкин.
Моттанинг ўзи ҳам яқин келажакда мураббийлик курсисига қайтишга тўлиқ тайёр эканини маълум қилган.
Эслатиб ўтамиз, унинг сўнгги иш жойи Туриннинг «Ювентус» клуби бўлган эди. Бироқ унинг «кекса синьора» рулидаги фаолияти узоққа чўзилмади — мутахассис қониқарсиз натижалар туфайли 2025 йилнинг март ойида (атиги бир йиллик фаолиятдан сўнг) Турин клубини тарк этишга мажбур бўлганди. Тьяго Мотта мураббийлик фаолияти давомида, шунингдек, «Болонья», «Специя» ва «Женоа» клубларини ҳам бошқарган.
