Туркия рақиб дарвозаси томон 62 марта зарба бериб, бирорта ҳам гол ура олмади
Туркия терма жамоаси 2026 йилги Жаҳон чемпионатида анти-рекорд қайд этди. Бу ҳақда Opta хабар берди.
Маълум қилинишича, турк футболчилари гуруҳ босқичидаги дастлабки икки учрашувда рақиб дарвозаси томон жами 62 марта зарба йўллаган бўлса-да, бирорта гол ура олмаган. Opta 1966 йилдан буён юритиб келаётган статистикага кўра, бу Жаҳон чемпионати тарихидаги икки ўйинлик давр учун энг ёмон натижа ҳисобланади.
Туркия терма жамоаси биринчи турда Австралияга 0:2 ҳисобида имкониятни бой берган бўлса, иккинчи учрашувда Парагвайга 0:1 ҳисобида мағлуб бўлган. Шу тариқа жамоа гуруҳ босқичи якунланмасидан туриб плей-офф йўлланмаси учун курашдан чиқиб кетган.
2026 йилги Жаҳон чемпионати АҚШ, Мексика ва Канада мезбонлигида ўтказилмоқда. Мусобақа 11 июнда бошланган бўлиб, 19 июлга қадар давом этади. Амалдаги жаҳон чемпиони — Аргентина терма жамоаси.
