Тухел номга эмас, сифатга эътибор берди. ЖЧ-2026дан тушиб қолган инглизлар
Томас Тухель Англия миллий терма жамоасининг жаҳон чемпионати учун якуний қайдномасини эълон қилди. Германиялик мутахассис номга эмас, сифатга эътибор берди. Натижада бир қатор ўйинчилар тушиб қолди.
Фил Фоден
Фоденнинг таркибга киритилмагани ажабланарли эмас. Ҳатто унинг энг содиқ мухлислари ҳам тан олиши керак — у жорий мавсумда чақирувга лойиқ даражада ўйин кўрсата олмади. «Манчестер Сити»да ўйин амалиёти кам бўлди ва форма ҳам унчалик яхши эмас эди. Албатта, сўнгги ўйинларда у анча фаол кўринди, лекин бу Томас Тухель қарорини ўзгартириш учун етарли бўлмади. Мураббий унга сўнгги танаффусда имконият берган, аммо Фоден бундан фойдалана олмади.
Коул Палмер
Икки йил аввал Евро-2024 финалида Англия учун гол урганида, унинг Жаҳон чемпионатига бормаслиги тасаввурга ҳам сиғмасди. Аммо ҳозирги ҳолат шундай: клублар ўртасидаги Жаҳон чемпионати финалидан кейин у барча мусобақаларда пенальтисиз атиги 5 та гол урди ва 3 та ассист берди. Узоқ давом этган қов (пах) жароҳати ва «Челси»даги беқарорлик ўз таъсирини кўрсатди. Балки ёзги таътил унга ҳам, янги мураббий Хаби Алонсога ҳам фойда келтирар.
Леви Колуилл
23 ёшли ҳимоячи мавсумнинг катта қисмини оғир тизза жароҳати сабаб ўтказиб юборди. Томас Тухель «Уэмбли»да уни «Манчестер Сити»га қарши Кубок финалида кузатди — бу унинг АПЛдаги иккинчи ўйини эди. Колуилл учун ҳам ёзги дам олиш ва янги мавсумга тайёргарлик муҳим. Агар яна жароҳат олмаса, кузда терма жамоага қайтиши мумкин.
Люк Шоу
Якшанба куни у «Манчестер Юнайтед» сафида АПЛдаги 38-ўйинини асосий таркибда ўтказиши мумкин. 30 ёшли футболчи барқарор ўйинчи, аммо у сўнгги бор Евро-2024да термага чақирилган, шунинг учун унинг йўқлиги кутилган ҳолат.
Харри Магуайр
Магуайр ўтган ойда ЖЧ унинг сўнгги турнири бўлиши мумкинлигини айтган ва ҳатто захирада ўтиришга ҳам рози эканини билдирган эди. Аммо у таркибга киритилмади.
У бу қарорга шундай муносабат билдирди:
«Мен ўзимни бу мавсумдан кейин жамоада муҳим роль ўйнай оламан деб ўйлаган эдим. Бу қарор мени ҳайратда қолдирди. Мен доим ўз мамлакатим учун ўйнашни яхши кўрардим. Жамоага омад тилайман».
Унинг оила аъзолари ҳам бу қарорни танқид қилди. Укаси Жо: «Бу ҳаётимда кўрган энг ёмон қарорлардан бири», деб ёзди. Онаси Зои эса: «Бу жуда ғазабланарли», деди.
Морган Гиббс-Уайт
У Витор Перейра келганидан кейин «Ноттингем Форест»да жуда яхши ўйнади. Аммо Томас Тухель унга ишонмади ва у кўп ҳолларда захирада қолди. Шунингдек, у «Челси» дарвозабони Роберт Санчес билан тўқнашувда оғир бош жароҳати олгани ҳам чақирувга тўсқинлик қилди.
Доминик Калверт-Льюин
У март ойида яхши мавсумдан кейин чақирув олганида жуда хурсанд бўлган эди. Асосий ҳужумчи сифатида Гарри Кейн ўйнаши аниқ эди, Калверт-Льюин эса унинг захираси бўлиши мумкин эди. Аммо бу рол учун Айвен Тоуни танланди.
Трент Александер-Арнольд
Трент «Ливерпуль»дан Реал Мадридга ўтганда бундай натижани кутмаган эди. «Реал» мавсумни омадсиз ўтказди ва турли муаммоларга дуч келди. Шунга қарамай, кўпчилик фикрича, уни Жаҳон чемпионатига олиш мумкин эди.
