Tuhel nomga emas, sifatga e’tibor berdi. JCH-2026dan chetda qolgan inglizlar
Tomas Tuhel Angliya milliy terma jamoasining jahon chempionati uchun yakuniy qaydnomasini e’lon qildi. Germaniyalik mutaxassis nomga emas, sifatga e’tibor berdi. Natijada bir qator o‘yinchilar tarkibdan chetda qoldi.
Fil Foden
Fodenning tarkibga kiritilmagani ajablanarli emas. Hatto uning eng sodiq muxlislari ham tan olishi kerak — u joriy mavsumda chaqiruvga loyiq darajada o‘yin ko‘rsata olmadi. “Manchester Siti”da o‘yin amaliyoti kam bo‘ldi va formasi ham unchalik yaxshi emas edi. Albatta, so‘nggi o‘yinlarda u ancha faollik ko‘rsatdi, lekin bu Tomas Tuhel qarorini o‘zgartirish uchun yetarli bo‘lmadi. Murabbiy unga so‘nggi tanaffusda imkoniyat bergan, ammo Foden bundan foydalana olmadi.
Koul Palmer
Ikki yil avval Yevro-2024 finalida Angliya uchun gol urganda, uning Jahon chempionatiga bormasligi tasavvurga ham sig‘masdi. Ammo hozirgi holat shunday: klublar o‘rtasidagi Jahon chempionati finalidan so‘ng u barcha musobaqalarda penaltisiz atigi 5 ta gol urdi va 3 ta assist berdi. Uzoq davom etgan qov (pah) jarohati va “Chelsi”dagi beqarorlik o‘z ta’sirini ko‘rsatdi. Balki yozgi ta’til unga ham, yangi murabbiy Xabi Alonsoga ham foyda keltirar.
Levi Colwill
23 yoshli himoyachi mavsumning katta qismini og‘ir tizza jarohati sababli o‘tkazib yubordi. Tomas Tuhel “Uembli”da uni “Manchester Siti”ga qarshi Kubok finalida kuzatdi — bu uning APLdagi ikkinchi o‘yini edi. Colwill uchun ham yozgi dam olish va yangi mavsumga tayyorgarlik muhim. Agar yana jarohat olmasa, kuzda terma jamoaga qaytishi mumkin.
Lyuk Shou
Yakshanba kuni u “Manchester Yunayted” safida APLdagi 38-o‘yinini asosiy tarkibda o‘tkazishi mumkin. 30 yoshli futbolchi barqaror o‘yinchi, ammo u so‘nggi bor Yevro-2024da termaga chaqirilgan, shuning uchun uning yo‘qligi kutilgan holat.
Harri Maguayr
Maguayr o‘tgan oyda JCH uning so‘nggi turniri bo‘lishi mumkinligini aytgan va hatto zaxirada o‘tirishga ham rozi ekanini bildirgan edi. Ammo u tarkibga kiritilmadi.
U bu qarorga shunday munosabat bildirdi:
“Men o‘zimni bu mavsumdan keyin jamoada muhim rol o‘ynay olaman deb o‘ylagan edim. Bu qaror meni hayratda qoldirdi. Men doim o‘z mamlakatim uchun o‘ynashni yaxshi ko‘rardim. Jamoaga omad tilayman”.
Uning oila a’zolari ham bu qarorni tanqid qildi. Ukasi Jo: “Bu hayotimda ko‘rgan eng yomon qarorlardan biri”, deb yozdi. Onasi Zoi esa: “Bu juda g‘azablanarli”, dedi.
Morgan Gibbs-Uayt
U Vitor Pereira kelganidan so‘ng “Nottingem Forest”da juda yaxshi o‘ynadi. Ammo Tomas Tuhel unga ishonmadi va u ko‘p hollarda zaxirada qoldi. Shuningdek, u “Chelsi” darvozaboni Robert Sanchez bilan to‘qnashuvda og‘ir bosh jarohati olgani ham chaqiruvga to‘sqinlik qildi.
Dominic Kalvert-Levin
U mart oyida yaxshi mavsumdan so‘ng chaqiruv olganida juda xursand bo‘lgan edi. Asosiy hujumchi sifatida Harri Keyn o‘ynashi aniq edi, Calvert-Levin esa uning zaxirasi bo‘lishi mumkin edi. Ammo bu rol uchun Ayven Touni tanlandi.
Trent Alexander-Arnold
Trent “Liverpul”dan Real Madridga o‘tganida bunday natijani kutmagan edi. “Real” mavsumni omadsiz o‘tkazdi va turli muammolarga duch keldi. Shunga qaramay, ko‘pchilik fikricha, uni Jahon chempionatiga olish mumkin edi.
