Тухель 2022-йилда Роналдунинг «Челси»га трансферини тўхтатгани маълум бўлди
Криштиану Роналду 2022-йилда «Манчестер Юнайтед»дан «Челси»га ўтишга яқин бўлган, бироқ ўша пайтдаги бош мураббий Томас Тухель трансферга қарши чиққан. Лондон клуби раҳбари Тодд Боули португалиялик юлдузни жамоага олиб келиш имкониятини жиддий кўриб чиққан. Бу ҳақда The Athletic нашри хабар бермоқда.
Манбага кўра, Боули 2022-йил ёзида Роналдунинг ўша пайтдаги агенти Жорже Мендеш билан учрашган ва ҳужумчини «Стэмфорд Бридж»га олиб келиш ғоясига қизиқиш билдирган. Аммо Тухель бу трансферга бир неча бор қатъий қаршилик кўрсатган ва якунда «Челси» музокараларни давом эттирмаган.
Ўша вақтда Роналду «Манчестер Юнайтед»ни тарк этиш истагини билдирган ва унинг келажаги атрофида кўплаб миш-мишлар тарқалган эди. «Челси» эса Рахим Стерлингни қўлга киритгач, асосий эътиборини бошқа позицияларни кучайтиришга қаратган.
Маълумот учун, Роналду 2022-йил ноябрида «Манчестер Юнайтед» билан шартномасини ўзаро келишув асосида бекор қилган. Кейинчалик у Саудия Арабистонининг «Ал-Наср» клубига кўчиб ўтган.
