ЦСКАнинг собиқ футболчиси ўзбекистонлик Файзуллаевнинг ўйин даражаси пасайганини таъкидлади
Москва ЦСКА жамоасининг собиқ аъзоси Валерий Масалитин Metaratings.ru порталига берган интервьюсида жамоа яримҳимоячиси Аббосбек Файзуллаевнинг ўйини ҳақида фикр билдирди. У ёш футболчининг ҳозирги формаси, майдондаги вазифалари ва унинг ривожланиш истиқболлари ҳақида тўхталиб ўтди. Масалитинга кўра, чап қанотда ҳаракат қиладиган Файзуллаев ўзини эркин ҳис қилганда яхши ўйнайди.
«У қанотда ўйнаганда, фақат рақиб ҳимоячисига қарши курашади, орқасида эса бўшлик бўлади. Марказда эса у доимий босим ва орқага қайтиш мажбурияти туфайли ўзининг кучли жиҳатларини йўқотади», — деди мутахассис.
Масалитиннинг таъкидлашича, Файзуллаевнинг жисмоний ҳолати унга кучли курашларда ёки рақибни танаси билан сиқиб чиқаришда қийинчилик туғдиради. Бу ҳолат 21 ёшли футболчининг жорий мавсумдаги ўйини олдингига нисбатан камроқ самара беришига сабаблардан бири бўлган. Шунга қарамай, Масалитин Аббосбек янги шароитларга мослаша олишига ва жамоага фойда келтиришда давом этишига ишонади.
«Уни ҳозир ижарага бериш керак эмас. У янги рольда ҳам ўзини кўрсата олади», — деди Масалитин.
