CSKAning sobiq futbolchisi o‘zbekistonlik Fayzullaevning o‘yin darajasi pasayganini ta'kidladi
Moskva CSKA jamoasining sobiq a'zosi Valeriy Masalitin Metaratings.ru portaliga bergan intervyusida jamoa yarimhimoyachisi Abbosbek Fayzullaevning o‘yini haqida fikr bildirdi. U yosh futbolchining hozirgi formasi, maydondagi vazifalari va uning rivojlanish istiqbollari haqida to‘xtalib o‘tdi. Masalitinga ko‘ra, chap qanotda harakat qiladigan Fayzullaev o‘zini erkin his qilganda yaxshi o‘ynaydi.
«U qanotda o‘ynaganda, faqat raqib himoyachisiga qarshi kurashadi, orqasida esa bo‘shliq bo‘ladi. Markazda esa u doimiy bosim va orqaga qaytish majburiyati tufayli o‘zining kuchli jihatlarini yo‘qotadi», — dedi mutaxassis.
Masalitinning ta'kidlashicha, Fayzullaevning jismoniy holati unga kuchli kurashlarda yoki raqibni tanasi bilan siqib chiqarishda qiyinchilik tug‘diradi. Bu holat 21 yoshli futbolchining joriy mavsumdagi o‘yini oldingiga nisbatan kamroq samara berishiga sabab bo‘lgan. Shunga qaramay, Masalitin Abbosbek yangi sharoitlarga moslasha olishiga va jamoaga foyda keltirishda davom etishiga ishonadi.
«Uni hozir ijaraga berish kerak emas. U yangi rolda ham o‘zini ko‘rsata oladi», — dedi Masalitin.
