Трент Александер-Арнолд мавсум якунлангач «Ливерпул»ни тарк этаётганини эълон қилди
«Ливерпул» ҳимоячиси Трент Александер-Арнолд жорий мавсум тугагач жамоани тарк этишини маълум қилди. У бу ҳақда шахсий ижтимоий тармоқларида ёзди.
«20 йилдан сўнг айтишимга тўғри келяпти: мавсум тугаганидан кейин «Ливерпул»ни тарк этаман. Бу ҳаётимдаги энг оғир қарор. Нега шу пайтгача жим юрганимни кўпчилик сўраганини биламан. Лекин мен жамоанинг асосий мақсади — 20-чемпионликка эришишга бор диққатимни қаратдим. Бу клуб мен учун 20 йиллик ҳаёт, муҳит бўлди. Академиядан то бугунгача клуб ичида ва ташқарисидаги одамлардан муҳаббат ва ёрдам олдим. Ҳаммага абадий миннатдорман. Энди эса янги синовни қабул қилиш, ўзимни янги шароитда синаб кўриш вақти келди. Кун сайин бор кучим билан ишладим ва умид қиламанки, сизлар бундан хабардор бўлгансиз. Барчага — мураббийларга, раҳбариятга, жамоадошларимга, ходимларга ва ажойиб мухлисларга — сўнгги 20 йил учун ташаккур.
«Ливерпул»да орзум рўёбга чиқди ва биргаликда кечирган ўша бетакрор лаҳзаларни умрим бўйи эслаб юраман. Бу клубга бўлган муҳаббатим ҳеч қачон сўнмайди», — деб ёзди Арнолд.
