Тренер ва инструкторлар учун янги аттестация тартиби тасдиқланди
2025 йил 7 августдаги Ҳукумат қарори (№500) билан жисмоний тарбия ва спорт ташкилотларидаги тренер-ўқитувчи ҳамда инструктор-методистларга малака тоифаларини бериш тартибини белгилайдиган низом тасдиқланди. Бу ҳақда Адлия вазирлиги матбуот хизмати хабар берди.
Ҳужжатга кўра, аттестациядан ўтиш учун давлат хизмати ҳақи сифатида бир асосий ҳисоблаш миқдори (АҲМ) миқдорида тўлов белгиланган. Жараён Спорт вазирлиги бошқарадиган «ERP sport» тизими орқали амалга оширилади.
Мутахассисларга иккинчи, биринчи ёки олий тоифа бериш мумкин бўлади. Барча босқичлар муваффақиятли якунланиб, маълумотлар тўлиқ шакллантирилганидан сўнг, QR-кодли электрон гувоҳнома бир иш куни ичида расмийлаштирилади. Бу ҳақда тренер ва инструкторларга «Электрон ҳукумат» платформаси орқали SMS-хабар юборилади.
Малака тоифаси 4 йил муддатга берилади.
