Трамп: “Қизил карточка нима эканини ҳам билмасдим”
АҚШ президенти Дональд Трамп ЖЧ-2026 доирасида Фоларин Балогуннинг қизил карточкаси билан боғлиқ вазият юзасидан илк бор изоҳ берди.
Трампнинг айтишича, у футбол қоидаларини чуқур билмайди ва дастлаб қизил карточка нимани англатишини ҳам тушунмаган. Шунга қарамай, у вазият билан танишгач, қарорни қайта кўриб чиқиш масаласида FIFA президенти Жанни Инфантино билан боғланганини тасдиқлади.
“Мен қизил карточка нима эканини ҳам билмасдим. Менга вазиятни тушунтиришди ва бу жуда адолатсиз қарор бўлиб туюлди. Шундан кейин Жанни Инфантино билан боғландим”, — деди Трамп.
Эслатиб ўтамиз, Балогун Босния ва Герцеговинага қарши учрашувда қизил карточка олиб, автоматик равишда битта ўйинга дисквалификация қилинганди. Бироқ FIFA кейинчалик ушбу жазони бир йиллик синов муддатига қолдирди ва футболчига Бельгияга қарши нимчорак финал учрашувида майдонга тушишга рухсат берди. Мазкур қарор UEFA ҳамда Бельгия футбол федерацияси томонидан кескин танқид қилинди.