«Тоттенҳэм»нинг 2026 йилдаги ютуқсиз серияси 9 та ўйинга етди
Англия Премьер-лигасининг 27-тури доирасида ўтган Шимолий Лондон дерисида «Тоттенҳэм» ўз майдонида «Арсенал»га йирик — 1:4 ҳисобида имкониятни бой берди. Шу тариқа, «шпорлар»нинг 2026 йилдаги ютуқсиз серияси 9 та ўйинга етди.
Янги календарь йили бошлангандан буён «Тоттенҳэм» бирор марта ҳам уч очко қўлга кирита олгани йўқ. Аввалроқ жамоа «Брентфорд» (0:0), «Сандерленд» (1:1), «Бёрнли» (2:2) ва «Манчестер Сити» (2:2) билан дуранг ўйнаган бўлса, «Борнмут» (2:3), «Вест Хэм» (1:2), «Манчестер Юнайтед» (0:2) ва «Ньюкасл» (1:2) клубларига мағлуб бўлган эди.
Ушбу омадсиз натижалардан сўнг «Тоттенҳэм» 29 очко билан турнир жадвалининг 16-поғонасига тушиб кетди. Жамоанинг хавфли ҳудуд билан оралиқ масофаси қисқариб бормоқда.
Маълумот учун, «шпорлар» ўзининг навбатдаги ўйинини 1 март куни сафарда «Фулҳэм»га қарши ўтказади.
