«Тоттенҳем» Канье Уэстга ўз стадионида концерт беришга рухсат бермади
Лондоннинг «Тоттенҳем» клуби америкалик рэпер ва продюсер Канье Уэстга ўз стадионида концерт беришга рухсат бермади. Daily Mail нашрининг хабар беришича, бунга артистнинг антисемитизм руҳидаги баёнотлари ҳамда клубнинг яҳудийлар жамоаси билан бўлган тарихий алоқалари сабаб бўлган.
Стадиондаги рад жавобидан сўнг рэпер «Wireless Festival» фестивалида чиқиш қилиш учун таклиф қилинди. Бироқ ушбу қарор кескин танқидларга сабаб бўлди ва натижада икки йирик ҳомий тадбирда иштирок этишдан бош тортди.
«Pepsi» компанияси Канье Уэстнинг фестиваль хедлайнери сифатида иштирок этишига норозилик билдириб, ҳомийликни тўхтатишини эълон қилди. Бир неча соат ўтгач, таркибига «Guinness», «Johnnie Walker» ва «Captain Morgan» брендлари кирувчи «Diageo» компанияси ҳам «Pepsi»нинг қарорини қўллаб-қувватлади.
Буюк Британия Бош вазири Кир Стармер мазкур вазиятга муносабат билдириб, фестиваль ташкилотчиларининг Канье Уэстни таклиф қилиш ҳақидаги қарорини «чуқур ташвиш уйғотувчи ҳолат» деб атади. Шунингдек, у рэпернинг аввалги чиқишларини инобатга олган ҳолда, унинг мамлакатга киришини тақиқлаш эҳтимоли мавжудлигини қайд этди.
