«Тоттенҳэм» бир йил ичида учинчи мураббийни истеъфога чиқарди
Лондонинг «Тоттенҳэм» клуби ўз расмий сайтида жамоа бош мураббийи Игор Тудорнинг истеъфога чиқарилганини эълон қилди. Бу «шпорлар» қароргоҳида сўнгги бир йил ичидаги учинчи мураббий алмашинувидир.
Эслатиб ўтамиз, 2025 йилнинг июн ойида Лондон клуби 2023 йил июлидан бери жамоада ишлаб келган ва жамоа билан УЕФА Европа Лигасида ғолиб чиққан Ангелос Постекоглуни истеъфога чиқарган эди. Унинг ўрнини эгаллаган Томас Франк эса жорий йилнинг феврал ойида жамоани тарк этди.
Игор Тудор 14 февралдан буён «Тоттенҳэм»ни бошқариб келаётган эди. Унинг қўл остида жамоа 7 та учрашувда 5 та мағлубият қайд этди. Айни дамда Лондон клуби 30 очко билан АПЛ турнир жадвалида 17-ўринни эгаллаб турибди ва қуйи лигага тушиб кетиш зонасидан бор-йўғи бир очко олдинда, холос.
